荃灣中槍案曾志健消失一年多，當日為救「健仔」被捕的博士生邱宏達今日旁聽。他坦言，跟大家一樣感到愕然，「一張又一張嘅新聞相，令我久久不能自已」，這一刻思緒仍然凌亂。

他透過前區議員李傲然回應傳媒：「大家好，我係邱宏達，噚晚收到健仔要上庭嘅消息，我同大家一樣咁愕然。儘管疑團越搵越多、網友甚至留言提及我，我仍然忍唔住成晚透過唔同渠道 fact check ，然後我就明白到最可靠嘅方法，其實係親身到庭旁聽，試吓見唔見到佢本人、聽吓控辯雙方點講。

雖然大家未必有我擺得咁多時間喺學業度，但係我哋嘅求真精神，係一致嘅，希望各位香港人唔好嫌我唚氣，俾我講兩句。

真係俾我見到佢嘅時候，我前後諗過點同佢講嘅千言萬語，最後竟然一句都醒唔起；響法庭旁聽席間聚精會神，只為聽清楚佢哋呢兩年嚟，過嘅係乜嘢日子 ── 但，控方講得好清楚，眾被告由始至終保持緘默，只承認自己缺席聆訊。

然而後來警方國安處記者會，居然講咗一個咁鉅細無遺嘅版本，我真係無辦法分到，到底邊一句先係可以信、邊一句我要好好諗清楚。而同時法庭範圍內理應係唔可以影相，但一張又一張嘅新聞相，令我久久不能自已。

我都無從得知個故事係點，呢一刻，我嘅思緒都仲係有啲凌亂。」

他入獄前曾接受眾新聞訪問，說過：「我諗你依家嘅生活都係艱苦嘅。我作為大哥哥，保證唔到你可以再喺香港幾時出現返。但我希望你唔使擔心喺度嘅大哥哥架啦。將來嘅生活努力啲啦，可能前面嘅路好艱苦。如果有日我喺天涯海角再撞返你嘅時候，你記得點頭笑吓。」