在Instagram，有人分享一段無厘頭的片段：一個赤膊男生，抱著雙手，一邊左右擺頭，一邊注視玻璃樽內中的拿破侖蛋糕。每段片都差不多，有時男生會說些讓人摸不著頭腦的話，又或只是發出笑聲，甚至在旁邊跳舞，唯一最大不同的是每天愈見腐爛的蛋糕。
他在帳號簡介如此寫著：「2022年2月24號開始禁堂食，我把握最後機會買咗一份蛋糕，入面有兩件我實在唔忍心食最後一件，所以我決定留佢喺度，直到我唔洗打針就可以入食肆為止，作此紀錄。」
這位一頭及肩長髮、23歲的大男孩Bobby，16歲便開始打工，先後做過廚房、木工，後來被看中高佻的身形，不時會接模特兒、MV演員工作。別看他在鏡頭面前神態自若，真人卻是慢熱內斂，很多時都要靠在旁邊，讓比他年長9年的女友雅詩幫忙，引導他一步步回答問題。
在政府禁未打針人士進入表列處所前三天，兩人把握最後機會，到香港瑰麗酒店買了一套下午茶，外賣自取比堂食便宜，688元有交易。
「我哋好少咁食㗎，係啲隆重嘅日子先會食」，那麼2月21是重要日子嗎？「之後連酒店都入唔到、買唔到喇，臨尾緊係要食一次先。」
Bobby笑指女友愛吃甜點，尤其那件招牌拿破侖，「成個餐好多嘢、分咗幾日食，但拿破崙食咗一件，唔捨得食埋另一件，擺吓又一日，擺吓又一日。」最後他突然想到，不如就繼續將蛋糕放在玻璃樽中，直至可以不用打針也能堂食為止。女友聽見，反覺得這是訓練男友面對鏡頭的機會，於是一同開Page記錄這塊蛋糕腐爛的過程。
我們很幸運，有得揀
「我唔想冒嗰個風險，你打針前簽名嘅時候，上面已經寫明會出現咩副作用。」兩人不打針的原因很簡單——害怕副作用。「我自己會揀，確診抑或打針邊樣嘅後果。」
雅詩也是自由工作者，除了打理古著網店，有時也會接一些廣告配音工作。二人反覆強調自己「很幸運」，因為大家有著相同取態，工作也容許他們不打針，相反香港很多人無得揀：「身邊有好多人根本就唔想打針，但因為做嘢而要『硬啪』枝針，明明陀住個小朋友，因為返工都要硬食。」Bobby說女友每逢聽到這些故事都會落淚，雅詩聞言又哭又笑：「仆街，而家都講到有啲流啲眼水出嚟添。」
不過，有些工作則要求全體人員必須打針，例如舞台劇，她本很期待這難得的機會，最終也只能辭演。「簽約嗰陣未知要打針嘅，但後尾發現唔打針真係無辦法，就唯有辭演。因為覺得我唔想⋯⋯去做一個決定令我以後會後悔。」
「無架喇，就唯有放棄，點都要取捨。但係我覺得，如果我能力範圍內可以保護自己，可以唔打就唔打。」
打唔打針，強行將每一個人分類
市道差，木工和模特兒的工作也不多，Bobby有段時間無工開，定時定候幫這塊瘀瘀黑黑的蛋糕拍片，倒是成了日常。女友笑說，「佢每日差唔多鐘數，就會叫我埋位幫佢拍。」他靦腆淺笑點頭。
除了拍片，兩人就宅在家看電影、打電動、煮飯，外出散步也頂多到家附近兜圈，然後買外賣回家，「你嘅生活，就算出街，除咗離開屋企個門之外，咩都唔做得。」若人有三急，「你連入商場借個廁所都覺得心好驚，死啦我係咪做錯嘢，我入唔入得㗎？」
試過有朋友約食飯，「成班人要就我一個，好似好對佢哋唔住 …『係喎你無打針，咁我哋去邊好呢』，好似如果唔係因為我，你哋就唔會咁麻煩。」
「打唔打針好像強行將每一個人分類，會覺得自己無辦法融入佢哋，佢哋打咗一定係話出去邊度玩，但問到你嘅時候，你係唔做得，就好似你做錯嘢咁。人係群體生物，會覺得自己唔係咁埋堆、有啲多餘。」
防疫政策下，社會彷彿分隔了「兩類人」。
被社會隱藏一群 從蛋糕專頁碰見彼此
截至2022年5月26日，政府數據顯示超過九成，三歲或以上人口已接種第一劑疫苗；舖天蓋地的打針廣告，商店酒廊逐漸回復正常營業時間，馬照跑、舞照跳。然而，仍有約71萬人未有注射任何疫苗，這群不能去髮型屋、美容院、連商場都無法進入的人，雅詩形容就像「匿埋喺山入面」，被社會隱藏的一群。
但蛋糕專頁卻讓他們碰見彼此，有讀者會向他們訴苦：有人躊躇應否打針、有人被迫打針後覺得「對自己唔住」哭了一整天、也有人說與伴侶在打針上的意願不同，成了感情危機⋯⋯
與其說是圍爐，倒不如說像在告解，難得在網絡上找到有人和自己一樣不願打針，就似在風高浪急的峽灣出現一艘小船，小船旁有一隻隻高舉，快被淹沒的手，等待船員接應。
「而家好似用『打咗幾多枝針』分等級咁，之前話打咗一支可以食飯，啲人諗住硬食一支就可以有啲娛樂。點知而家又話打兩支先有得睇戲，個個都係到等（防疫政策放寬），其實點解要咁呢？都係食個飯，睇個戲啫。」雅詩盤著腿，梳著及腰的長髮道。
蛋糕由金黃色、脹卜卜、填滿兩層雲尼拿忌廉，經過90日被密封在玻璃樽的生活，漸漸腐爛收縮，像在自然分解。現時蛋糕已不能直立，但有讀者說：「那就讓它躺平。」
大城誌 